អន្តរជាតិ៖ នៅថ្ងៃសុក្រចុងសប្តាហ៍នេះ ហុងកុងបានចេញផ្សាយសេចក្តីព្រាងច្បាប់សន្តិសុខជាតិថ្មីមួយ ដែលត្រូវបានគេសម្លឹងឃើញថាជាការរឹតបន្តឹងបន្ថែមក្នុងគោលបំណងបង្ការនូវការបះបោរ រួមជាមួយការបែកធ្លាយនូវឯកសារសម្ងាត់់របស់រដ្ឋ ខណៈសេចក្ដីព្រាងច្បាប់ថ្មីនេះបានកំណត់ការដាក់ទណ្ឌកម្មកាន់តែធ្ងន់ធ្ងរជាងមុនបន្ថែមទៀត សម្រាប់អ្នកប្រព្រឹត្តល្មើសនឹងច្បាប់នេះ។ នៅក្នុងសេចក្ដីព្រាងច្បាប់នេះ បានសង្កត់ទៅលើអំពើល្មើសសំខាន់ៗចំនួន ៥ ដែលរួមមានការក្បត់ជាតិ ការបះបោរ ចារកម្ម និងការលួចយកឯកសាររបស់សម្ងាត់រដ្ឋ ការបំផ្លិចបំផ្លាញសន្តិសុខជាតិ និងការជ្រៀតជ្រែកពីបរទេស ជាអាទិ៍។
គួរឱ្យដឹងថា សេចក្ដីព្រាងច្បាប់នេះនឹងក្លាយជាច្បាប់សន្តិសុខជាតិទីពីររបស់ទីក្រុងហុងកុង បន្ទាប់ពីទីក្រុងប៉េកាំងបានប្រកាសដាក់ចេញនូវច្បាប់ស្ដីពីសន្តិសុខជាតិមួយកាលពីឆ្នាំ២០២០ ក្រោយពីមានហេតុការណ៍តវ៉ាប្រឆាំងនឹងរដ្ឋាភិបាលដ៏ធំមួយបានកើតឡើងនៅទីក្រុងហុងកុង។
ក្រុមប្រឹក្សានីតិប្បញ្ញត្តិបានចាប់ផ្តើមពិភាក្សាលើសេចក្តីព្រាងច្បាប់នេះកាលពីថ្ងៃសុក្រ ចំពេលមានការរឹតបន្តឹងសន្តិសុខយ៉ាងតឹងតែង ហើយប្រភពមួយចំនួនបានទម្លាយប្រាប់់់មកកាន់អ្នកសារព័ត៌មានថា សេចក្ដីព្រាងច្បាប់នេះអាចនឹងត្រូវបានអនុម័តនៅខែមេសាខាងមុខនេះ។ មេដឹកនាំហុងកុង លោក Jonh Lee កន្លងមកក៏ធ្លាប់បានប្រកាសថា លោកស្នើឱ្យសមាជិកសភាជំរុញការអនុម័តច្បាប់នេះឱ្យបានលឿនបំផុត។ លោកថ្លែងថា សេចក្ដីព្រាងច្បាប់នេះគឺជាទំនួលខុសត្រូវនៃរដ្ឋធម្មនុញ្ញរបស់ខ្លួន ក្រោមមាត្រា ២៣ នៃច្បាប់ជាមូលដ្ឋាន ឬហៅថាជារដ្ឋធម្មនុញ្ញខ្នាតតូចរបស់ហុងកុង ចាប់តាំងពីការចាកចេញពីក្រោមអាណានិគមរបស់ចក្រភពអង់គ្លេសកាលពីឆ្នាំ១៩៩៧។
គួរបញ្ជាក់ថា សេចក្ដីព្រាងច្បាប់នេះក៏បានកំណត់ទណ្ឌកម្មធ្ងន់ធ្ងរជាច្រើនមានដូចជា ការកាត់ទោសដាក់ពន្ធនាគារអស់មួយជីវិតពីបទក្បត់ជាតិ ការបះបោរ និងការបំផ្លិចបំផ្លាញរដ្ឋ, ទោសដាក់ពន្ធនាគារ ២០ឆ្នាំសម្រាប់អំពើចារកម្ម និងទោសពន្ធនាគារ ១០ឆ្នាំសម្រាប់ឧក្រិដ្ឋកម្មទាក់ទងនឹងការប៉ះពាល់ដល់ឯកសារសំខាន់ៗ និងឯកសារសម្ងាត់របស់រដ្ឋជាដើម៕
